Ստանդարտների ազգային ինստիտուտի տնօրեն Ե.Ազարյանի հրավերով ս.թ. ապրիլի 18-19 պաշտոնական այցով առաջին անգամ Հայաստանում էին գտնվում ԻՍՕ նախագահ Բ.Ալյոշինը և ՌԴ Տեխնիկական կանոնակարգման ու չափագիտության դաշնային գործակալության պետ Գ.Էլկինը:

Այցը նպատակ էր հետապնդում շեշտադրել ստանդարտացման կարևորությունը երկրի տնտեսական զարգացման գործընթացում, ինչպես նաև ըդգծել վերջին տարիներին Հայաստանի կողմից ձեռք բերված հաջողությունները միջազգային ստանդարտացման ասպարեզում:

Ապրիլի 18-ին պատվիրակությանն ընդունեց Հայաստանի Հանրապետության վարչապետ Տիգրան Սարգսյանը: «Ի դեմս ձեզ ստանդարտացման համակարգի ներդրման և կիրառման աշխատանքներում մենք ունենք լավ գործընկեր: Ուրախ ենք, որ մեր համագործակցությունը նպաստում է նաև Հայաստանի և Ռուսաստանի միջև հարաբերությունների ամրապդնմանը»,- կառավարության հասարակայնության հետ կապերի վարչության հաղորդմամբ, ասել է Տիգրան Սարգսյանը:

Վարչապետը գոհունակություն է հայտնել Ստանդարտացման միջազգային կազմակերպության հետ համագործակցությունից և շնորհակալություն հայտնել Բորիս Ալյուշինին՝ ատանդարտացման համակարգի կիրառման աշխատանքներում Հայաստանին ցուցաբերած օժանդակության համար:

Վարչապետը և Ստանդարտացման միջազգային կազմակերպության նախագահը քննարկել են երկկողմ հետագա համագործակցությանը, ստանդարտացման համակարգի կիրառման նպատակով իրականացվող բարեփոխումներին, ազգային ստանդարտների՝ միջազգային չափանիշներին ներդաշնակեցմանը վերաբերող հարցեր:

Նույն օրը ՀՀ էկոնոմիկայի նախարար Տիգրան Դավթյանն ընդունեց պատվիրակությունը: Հանդիպման ընթացքում զրուցակիցները անդրադարձան Հայաստանում ստանդարտացման բնագավառում իրականացվող գործընթացների ներդաշնակեցմանը միջազգային (ԻՍՕ), եվրոպական (ԵՆ) և միջպետական (ԳՕՍՏ) ստանդարտներին, քննարկեցին ստանդարտացման ծրագրերում սահմանված ազգային գերակայությունները, միջազգային ու տարածաշրջանային ստանդարտացման գործընթացում Հայաստանի ակտիվ մասնակցության հնարավորությունները:

Հանդիպման օրակարգում էր նաև Հայաստանի գործարար միջավայրի համար առավել բարենպաստ պայմաններ ստեղծելու և արտահանումը խթանելու նպատակով տեխնիկական խոչընդոտների վերացմանն ուղղված հարցերի քննարկումը:

Պաշտոնական հանդիպումներից հետո Բ.Ալյոշինը և Գ.Էլկինը այցելեցին Ստանդարտների ազգային ինստիտուտ, որտեղ նրանց ներկայացվեց Ինստիտուտի կողմից ստանդարտացման ոլորտում վերջին տարիներին իրականացված աշխատանքը: Բ.Ալյոշինը գոհունակություն հայտնեց Ինստիտուտի զարգացվածության մակարդակից և նշեց, որ ԻՍՕ-ն հետագայում ևս հետևողականորեն աջակցելու է զարգացող երկրներում ստանդարտացման զարգացմանը:

Ապրիլի 19-ին ԻՍՕ նախագահ Բ.Ալյոշինն այցելեց Երևանի պետական համալսարան, որտեղ համալսարանի Տնտեսագիտական ֆակուլտետի ուսանողների համար “Ստանդարտացման կարևորությունը տնտեսական զարգացման համար” թեմայով դասախողություն կարդաց: Դասախոսությունը մեծ հետաքրքրություն առաջացրեց ուսանողների ու դասախոսների շրջանում: Իսկ դասախոսության վերջում պարոն Ալյոշինը սիրով պատասխանեց հարցերին:

Այնուհետև, պատվիրակությունը այցելեց Ծիծեռնակաբերդի ցեղասպանության թանգարան և հուշահամալիր, որտեղ հարգանքի տուրք մատուցվեց Մեծ Եղերնի զոհերի հիշատակին:

Ապրիլի 19-ի օրվա երկրորդ կեսին պատվիրակությունը մասնակցեց Ստանդարտների ազգային ինստիտուտի նախաձեռնությամբ կազմակերպված Ստանդարտացման բնագավառի միանգամյա բացառիկ մրցանակաբաշխությանը:

Ստանդարտացման բնագավառում ցուցաբերած ակտիվ մասնակցության և ստանդարտների գործնականում արդյունավետ կիրառման համար Հայաստանյան 20 կազմակերպություններ արժանացան բարձրագույն և ոսկյա մրցանակների: Մրցանակները շնորհվեցին ԻՍՕ նախագահ Բ.Ալյոշինի, ՌԴ Տեխնիկական կանոնակարգման ու չափագիտության դաշնային գործակալության պետ Գ.Էլկինի, ՀՀ էկոնոմիկայի նախարար Տիգրան Դավթյանի և Ստանդարտների ազգային ինստիտուտի տնօրեն Ե.Ազարյանի կողմից:

Մրցանակաբաշխության համար սահմանվել էր երկու կարգի մրցանակ: «Ոսկյա մրցանակը» շնորհվեց այն 10 կազմակերպություններին, որոնք առավել մեծ չափով են կիրառում ստանդարտացման փաստաթղթերը: Դրանք են` Երևանի կոնյակի գործարանը («Արարատ» ապրանքանիշ), «Երևանի Արարատ կոնյակի-գինու-օղու կոմբինատ»-ը, «Ջերմուկ գրուփը», «ՌՌՌ» հանքային ջրերի գործարանը, «Գյումրի-Գարեջուր»-ը, շինարարական «Ֆիլիշին» ընկերությունը, «Դուստր Մարիաննա» կաթնամթերք արտադրողը, նավթամթերք ներմուծող «Ֆլեշը», «Արարատ ցեմենտը», «Բարի Սամարացին» (մսամթերք):

«Բարձրագույն մրցանակը» շնորհվեց ստանդարտացման գործընթացներում ակտիվ դերակատարում ունեցող 10 հեղինակավոր հայկական կազմակերպությունների: Դրանք են` «Չանախ» (կաթնամթերքի արտադրություն), «Արզնի տոհմային թռչնաֆաբրիկա», «Բեկոն պրոդուկտ» (մսամթերք), «Պոստ Լեքս Քոնսալթինգ» (հակակարկտային կայաններ), «Հայասի գրուփ» (սննդամթերք), «Ին մուլդ» (պլաստմասայե տարաներ), «Ջրվեժի մսամթերքի կոմբինատ», «Փ.Աբաջյան» (շինարարական նյութերի հավաստում և փորձարկում), «Հայաստանի էլեկտրական ցանցեր», «Ռոյալ Արմենիա» (սուրճ):

Բ. Ալյոշինն իր ողջույնի խոսքում նշեց, որ այսօր հանրությունը կանգնած է ընտրության առաջ, ստեղծվում են հիբրիդային շարժիչներ, ռեսուրսները այլ կերպ են օգտագործվում, բարձր տեխնոլոգիաները նոր հնարավորություններ են ընձեռում. «Ներկա մարտահրավերները պետք է հաղթահարել և դա պետք է անել ստանդարտացման միջոցով»: 

Ըստ Ալյոշինի, ընթացող գլոբալիզացման պայմաններում ստանդարտների դերը գնալով ավելի ու ավելի է աճում, և միջազգային ստանդարտների մշակման գործում մեծանում է զարգացող երկրների, այդ թվում՝ Հայաստանի դերը:

«Աշխարհը թևակոխել է հետինդուստրիալ շրջան, երբ արդյունաբերության դերը նվազում է, իսկ ԻՍՕ ստանդարտները ակտիվորեն կիրառվում են այլ ոլորտներում: Ով չի կիրառում ստանդարտները, մնում է մրցակցությունից դուրս»,- ասաց Բ. Ալյոշինը, նշելով, որ նախկինում ԻՍՕ ստանդարտները կիրառվում էին միայն արդյունաբերությունում:

ԻՍՕ-ն ներկայում ներառում է 163 երկիր, իսկ ԻՍՕ-ի կողմից մշակված ԻՍՕ 9001 “Որակի կառավարման համակարգ” ստանդարտը, օրինակ, աշխարհում կիրառություն է ստացել ավելի քան 5 մլն կազմակերպությունների կողմից, ինչը, ըստ Բ. Ալյոշինի, ընդգծում է ԻՍՕ-ի վիթխարի հեղինակությունը: Չնայած ստանդարտները կամավոր են, աշխարհում ԻՍՕ ստանդարտներն ավելի ու ավելի մեծ չափերով են ներդրվում պայմանագրային ու նորմատիվ փաստաթղթերում:

Ապրիլի 19-ի երեկոյան պատվիրակությունը մեկնեց Հայաստանից:

Կայացավ ԱՊՀ Ստանդարտացման, չափագիտության և սերտիֆիկացման միջպետական խորհրդի (ՄՊԽ) նախագահի և ՄՊԽ բյուրոյի պատասխանատու քարտուղարի առցանց հանդիպումը

ՀԱՄԱԳՈՐԾԱԿՑՈՒԹՅԱՆ ՀՈՒՇԱԳԻՐ

<<ՀՀ էկոնոմիկայի նախարարություն>>, <<Ստանդարտացման և չափագիտության ազգային մարմին>> ՓԲԸ-ի և <<Հայաստանի ազգային պոլիտեխնիկական համալսարան (հիմնադրամ)>>-ի միջև

ԱՊՀ Ստանդարտացման, չափագիտության և սերտիֆիկացման միջպետական խորհրդի նախագահ է ընտրվել Ալբերտ Բաբայանը

Ստանդարտների համաշխարհային օր