ԻՍՕ -ի (Ստանդարտացման միջազգային կազմակերպություն) "Զարգացող երկրներին աջակցության 2011-2015թթ. ծրագրի" շրջանակներում ԻՍՕ-ի և Ստանդարտների ազգային ինստիտուտի համատեղ ջանքերով 2011թ. նոյեմբերի 22-24 Երևանում կազմակերպվեց սեմինար` նվիրված ԻՍՕ 14001 "Շրջակա միջավայրի կառավարման համակարգ" ստանդարտի կիրառմանը:

Թեմայի ընտրությունը պատահական չէր: Թեև առաջին անգամ նշված ստանդարտն ընդունվել է Հայաստանում ազգային ստանդարտի կարգավիճակով դեռևս 2001թ.-ին, իսկ այնուհետև 2005թ.-ին փոխարինվել է ստանդարտի նոր տարբերակով, այդուհանդերձ շրջակա միջավայրի կառավարման համակարգի ներդրումը հայկական կազմակերպություններում լայն տարածում չունի: Բավական է նշել, որ մինչ այժմ ԻՍՕ 14001 ստանդարտով Հայաստանում սերտիֆիկացված կազմակերպությունների քանակը չի գերազանցում մեկ տասնյակը: Ցածր է մնում նաև ստանդարտի օգուտների վերաբերյալ իրազեկվածության մակարդակը:

"Էկոլոգիա" եւ "էկոնոմիկա" հասկացությունների հիմքում նույն "էկո" արմատն է: Միայն թե 21-րդ դարում դրանք կարծես անհամատեղելի են դարձել: Մինչ ամբողջ աշխարհի բնապահպաններն ահազանգում են ոլորտի խնդիրների մասին, օրեցօր մեծ թափով զարգացող տնտեսությունն իր հետ բերում է նոր բնապահպանական մարտահրավերներ: "Տնտեսվարողները դեռևս անտեսում են էկոլոգիական քաղաքականությունը",- հիշեցնում են մասնագետները:

Միաժամանակ, էկոլոգիական խնդիրները Հայաստանում գնալով սրանում, ինչը պայմանավորված է օդի աճող աղտոտվածությամբ, ապօրինի ծառահատումների հետևանքով անտառածածկ տարածքների նվազմամբ, զարգացող հանքարդյունաբերության ոլորտի շրջակա միջավայրի վրա բացասական ազդեցությամբ, ջրային ռեսուրսների անհաշվենկատ օգտագործմամբ և դրանց աղտոտվածության աճով և այլն: Գործնականում, աղտոտվածության առաջացման հիմնական պատճառը կազմակերպությունների անպատասխանատու վարքն է շրջակա միջավայրի հանդեպ: Հայտնի է, որ "մաքուր է ոչ թե այնտեղ, որտեղ մաքրում են, այլ այնտեղ, որտեղ չեն աղտոտում": ԻՍՕ 14001 համաշխարհային մեծ հռչակ ունեցող ստանդարտը չափազանց արդյունավետ գործիք է կազմակերպությունների էկոլոգիական խնդիրների համակարգված կառավարման համար: Ընդ որում, այն ոչ թե պարտադրում է կազմակերպությանն ի հաշիվ իր միջոցների ձեռնարկել զանազան միջոցառումներ` շրջակա միջավայրի վրա ազդեցությունը նվազեցնելու համար, այլ առաջարկում է այդ միջոցառումները ձեռնարկել նաև որոշակի ֆինանսական օգուտներ ստանալու նպատակով: Այսինքն` էկոլոգիական միջոցառումները համադրվում են կազմակերպության ֆինանսական օգուտների հետ: Հենց դա է պատճառը, որ աշխարհի ավելի քան 120 երկրներում արդեն 500000-ից ավելի կազմակերպություններ հաջողությամբ կիրառում են ստանդարտը:

 Շարունակելի